Sampe suvu sararaku pura-pura le, perapi do’a kana maseha pura komiu tulau suvu, merapi nte pue ta’ala asupaya rapakandatena umuruta, rakavata puasa ri mpae hi ranga.

Suvu, parantaeka miu pakabelo vei ranga eva nanoa puramo ranga posongko nu caleg nggapuri hi lee, singga navangi ane nanjayo, nonturo ri waru po kopi uuhh naasa mpu petagorona nte tona ranga.

Ane nosinggava ri waru po kopi hae suvu, naasa mpu caleg hi suvu, poganggona pale ntona hae ya uuu namadai, pale neganggo tapi mata nekinde muni sakide suvu, hehehe.

Ane matana nekinde rua nggani berarti nisanitamo ngena uruta sakuya caleg hae ri surat suara, tapi suvu kana ratora miu le, ane pekinde nu caleg hae nelabimo deana, adoh pakabelo le, anu njae biasana ngena tu.

Ledo aga haemo muni suvu, posongko nu caleg nggapuri hi peinta miu pakanoto vei ranga, naasa ntoto ranga, daginapa vai posongko ni kiai suvu. Nisavana sapatu baru vuri damo nenggila songko, pade nitunggai ngena nipaka mangga ane notesa ante tona pade notaja balengga.

Padahal suvu, biasana waktu dopa no caleg uuranga, damo nosovu lenje, domo rauli posongkona hae, potesana aga nasambara mpu, begitu nocaleg mai mau aga nosipekutana kareba hae langsung negoli hau ri nomorona potesa.

Tapi suvu, tora miu pakabelo petevaiku hi ranga, geira caleg hae ngena ranga nemo raala gaga tesana, po iyomo nuapa niulina peinta dodo geira hae, kira-kira miu mbotomo namampu ia hae mombawakili nuapa dota miu atau ledo.

Ane ri pokira-kira miu geira hae ledo namampu nemo ratosu ranga, nomapaka rugi miu mboto ngena, begitu monturo mai ngena domo rauli mosingganggo nte kita pura, kaca nu otona mai ngena maria domo ntoto raunggena.

Jadi suvu, tora pakebelo lee, peinta pakabelo sema ratosu miu. Tabe. (TOPANJAYO-NJAYO)