Sampe suvu sararaku lee, suvu rasani miu ane iriavi nariamo sampe suvuta ri savalikuna nompelisimo balengga nu pamarenta vai ranga. Eva geira ri Donggala, Parigi-Mautong ante geira ri Morowali.
Alhamdulillah lee suvu, geira nompelisi hituhi leria berimbana – berimbana ranga kana naama pura. Tapi aga domo kusani berimbana – berimbana ri bengora suvu apa ledo muni kuanu gaga lee.
Tapi hituhi suvu ane rasani miu nipoheraku hieranga, nakuya kate geira ri savalikuna nompelisi kate aga kita ri palu hi napane nangepena lee. Leraparcaya miu peinta mbotomo ranga eva ri facebook hae.
Eva nadeapa ranga kita ri palu nosuara daripada geira tona hamai mami, eva kitapa vai ranga nataupa nanggita mbana tona nabelo nte ledo. Eranga nasodo mpu lee, nadea ntotomo ranga tona natau ane panggitaku hi suvu.
Sakide-sakide nesuvumo dako ri sumbata tulau basa “sebenarnya ledo hae rapelisi, iya hi sebenarnya,”.
Mau domo rauli miu nisanikumo ranga suvu, tapi ane rauli miu leria berarti narasa mpu ranga kamango miu tu lee hehehe.
Anu vesia hae sebenarnya suvu rasani miu, tandana ane kita hi nagampa mpu ranga natekeni suasana, berimba tona vesitu muni kita. Hamai tona hamai muni kita pokonya eva leria ntanina kana nosilelo nju.
Mosabaramo ranga kita suvu, maria muni ngena tempona kita hi mompelisi, aga hae kutevaika kakomiu pura nemo ntoto lee ledo mompelisi apa narugi suarata ranga jadi mau berimbana kita hi kana mompelisi.
Ane ledo rasanita sema ratosuta, tuntunimo tona anu nipokedo rara miu, jadi vesiamo ruru lee suvu damo maria vai ngena tempona kita mosinggava lee suvu, tabe. (TOPANJAYO-NJAYO)
