Mbamo komiu todea, sampe suvu naria, kita aga mosipapainga ledo nosiparaika ngena, ri bula hi tempona vai kada nu uda nanau. Ledo ria tempo ane rapetionga langi kana naria kulimo vuri nasalibo ni peinta. Tantu ane naria ivesia hai, haimo hai nisangaka pompainga kakita pura, tempo nu uda ngena manau dako ri langi.
Boitumo itu kita singgani, ane mesuvu dako ri banua kana rapakasadia payu, rapake mekanolu ane rakava nu uda ridala. Ivesia muni ane topo motoro, kana radika riara bagasi baju ledo rapesua nu uda, asupaya ledo ranga madua kita mambela nu uda.
Ledo ngena aga hai muni sanu, naria sarara nobanua ledo nakavao dako ri bivi karona, ri bivi keke mbaso, ane mamala kana mainga nemo aga ma’ase monturo, maturu ri banua. Kana rapetidilo nemo sampe uve mesavi dako ri dalana.
Ivesia muni ante sarara banuana kana ni pesua nu uve ane ri tempat uda vesihi, ane mamala ranga kana raoretaka kadera, lamari, paturua, poapua riavu. Nemo sampe nadeamo uve mesua riara banua pade masesa kita mompasiyayuna.
Apa ane ringatata hi le, tumo rauli sarara ri Desa Tulo, ane tempo nu uda nipokaekara karona manggabuntu, nemo sampe perapi kadoa ante Pue Alata’ala ranga. Ivesia muni ante sarara rangata Palu mboto, ane tempo nu udamo, kana nipesua nu uve riara banuara.
Vesiamo ruru posipapaingata, rapajadikata panoto nurara, raposiulikata ante sararata pura-pura rangata. Tabe. (MANGGE MBASO)
