Sampe suvu sararaku le, perapi doa kana maseha pura kita tulau sampe pangane hitu. Maseha-seha pura, leria makakuranga sakidea dako RI katuvuata suvu.
Sararaku pura-pura, sampe pangane hitu arasani komiu pura ane data dako pamarenta ri propensi nanguli, sampe eo Kamisi iriavi rasani miu tona nambela covid 19 anu nabiasa niulita virus Corona ri Sulteng hi nantambai vaimo 157 tona. Data hai nanguli, deanapa katambaina dako ri Palu 35 tona.
Jadi rekena pura tona nambela corona dako mpae naliu sampe mpae pangane hitu suvu, Maria 4.215 tona nambelamo Corona ri Sulteng. Pade tona nabelomo naria 2.332 tona. Tona namate ante status covid Naria 119 tona.
Tapi Suvu, mau vesia data ri Sulteng tona nambela covid ane rakitata evaleria pangaruna ranga. Padahal rumba-rumba kita nolipa Naria pura baliho nepatora nemo rakalingasi mompasua masker. Ane rarasaimo madua domo mesuvu, ane mokuya-kuya Kana mombokosi pale, ante ane dako motingguli bara dako riumba posumomba tumo ruru mesuvu.
Naria pura kan petevai vesia nikitata. Tapi geira nombadekeika petevai vesia geira vaimo leria padulina nte Corona. Eva damo Ni aga-aga Corona hituhi. Padahal ruru makajamo bara kita hi maturu Kana mompasua masker muni, eranga.
Suvu, nitorapa miu mpae naliu partama-partamana Corona nompamula ri Sulteng, sampe naria ranga tomadua ni isolasi hamai ri ruma saki Anutapura nangova. Bongina hai suvu, nisani miu naupu tona tudu nombaragana ranga.
Tapi hituhi, tona nambela covid 19 damo aga vesia nggo suvu nitutusika. Rauli niisolasi Eva Ledo muni, apa nakapopa nangova-ngova ri Sokina ranga.
Eranga, bara vesiamo tano carana nombatangani virus Corona ri Sulteng, ledo nipakasimbayu carana. Nakajamo rauli sema nodoi iamo narasa. Jadi suvu vesiamo ruru ke tesata eo hi, Maria Vai ngena tempona kita mosinggava, Tabe. TOPANJAYO-NJAYO
