Sampesuvu sararaku pura-pura bongi pangane hitu nisanita puramo tulau ane Piala Dunia nompamula, mamala komiu pura ane madota mantara saitona ri banua patuvumo telepisi pade elomo ri TVRI suvu.
Tapi ane komiu tulau madota mantara maroa-roa, koimo ane vesitu elo ri waru ane panguli ngana nggapuri hi kafe suvu. Jadi eva nuapa hia naase muni nantara bala sabingga pade nanginu kopi muni sabingga supaya ledo maroyo mata.
Ntanina vai ane komiu aga madota mantara nggo ledo mobalanja tapi kana maroa roa, namala muni koimo ri kantoro TVRI Sulteng hamai ledoria topo parkir ledo muni nombayari nuapa-nuapa.
Pokoknya makava hamai damo aga mantara nggo komiu suvu, tapi kana rakeni muni sakide uve rainu mboto mbelaka ngena mabai tambolo, apa ane nantara bala hi eva lado naase ane ledo nongare, jadi kana nongare-ngare muni sakide haitumo saba nabai tambolo.
Tapi mba komiu suvu naria sakide petevai hi ala nemo rakalingasi pokarja ri kantoro le, kana ratora muni pokarja. Jadi nemo aga piala dunia nju ratara suvu. Ane nisanimo maile padondona maria karja domo mumi ratara pura nuapa nomore.
Apa ane rapeintata muni ja nompamula piala dunia hai naria nomore tinti tatalu bobayana suvu, berarti ane vesitu masadondo tano pembangu tu. Ntanina vai ane komiu naturu mamimo maliu sambaya isya pade membangu vai bobayana ledo nakuya.
Sangaya vai suvu petevai hi, nemo ngena mompari mantara bara rakalingasimo ngena posambaya, apa ane vesia ngena kajadina berarti leria gunana itu suvu, anu ledo nakana vesia paralupa topo maimbala piala Dunia dako posambaya.
Jadi vesiamo ruru suvu maria vai ngena tempona kita mosinggava, perapi doa kana maseha-seha pura kita tulau. (Topanjayo)
