Sampe suvu saraku pura-pura, pangane hi niepeta puramo tulau ane ali nu bensi pertamax nesavi vaimo dako ri sapu randua njobu najadi sapu aono njobuna.
Pesavina hitu nadea vai sakide suvu nompamula dako ri talunjobu sampe pata njobuna ranga. Anu biasana aga nesavi sanjobu hitumai pelabi-labinamo.
Tapi niuli tona dako ri pertamina, ane pamarenta hi kana repeintara nju ngena ali nu bensi pertamax hi berimba haselena ri kaupu nu bula, nambaso atau nakodi pangaruna nte katuvuata pura-pura.
Dopa muni nisani suvu sampe maipia pesavina ali nu bensi pertamax hitu, dopa naria bahasa dako ri pamarenta sampe maipia ranga, aga ri mpae hi atau ngena maliu sampe ri mpae makava.
Naria tona nanguli sampe maupu vei posibaga Iran ante Amerika, tapi naria muni tona nanguli nuanu sebenarna domo ali nu bensi raore tapi ra petamo ruru nuanu niulika makan bergizi gratis hae. Domo nisanita mbana nambela isemapa vai raepeta ranga.
Aga mba komiu pamarenta, ku tevaika kakomiu sakide papasa ntotua dako ri ngata hi, ane katuvua ntodea hi nandasa bayangimo ranga apa eva nasuli puramo nuanu raali rakande.
Nuangua puramo totua mombine riavu, parancina nesavi, marisa nesavi tumo rauli vai ose, nasuli ntotomo ranga. Dopa vai anata hi mosikola kana manggeni doi supaya kana mangande ledo maarantai ngana.
Jadi mba komiu pamarenta le, nemo aga karo mboto ante sarara miu mboto rapekirika apa komiu najadi pamarenta hitu ka todea pura-pura ledo aga kakomiu mboto, ratora kita hi ledo masae radunia hi maria tempona ngena rakabasakata puramo nuanu tu tabe. (Topanjayo)
