Niponguaka Ntonamo Atura Nu Ada

oleh -
Balengga Nu Ada Kota Palu Moh. Rum nombacaka sura mombaaturu garaka #2019 Ganti Presiden Ri Lapangan Vatulemo. (IST)

Sampe suvu sararaku le, eranga dopa nasae hi rasani miu suvu naria atura nu ada ra ngata niponguaka ntona pura.

Berimba ledo raponguaka, kate urusa ntona motesaka 2019 ganti presiden domo madota geira mangepena ranga. Huu padahal suvu rasani miu kita hi nemopa mompelisi presiden ranga kajapa aga nompelisi kapala desa damo nakanano.

Jadi ane panggitaku hi eva ledo muni nambela atura nikavia hae ranga, pade atura hi naria suvu damo marapa tempona kita mompelisi presiden hi ranga. Nakuya ledo dako rurupa waktu mompelisi wali kota hae atura vesihi nisuvuraka mami. Berimba lee nakana?

Batuana suvu, ledo muni rapakasala atura nu ada hae, aga ane panguliku hi eva ledo tempona nipotempona atura hae nesuvu ranga. Pade nakantara gaga ri atura hae niuli ane ada ra ngata hi ledo notarima geira notesaka 2019 ganti presiden ante alasa natantumo nitulisira hae.

Mba komiu lee sampe suvu sararaku pura-pura, yaku hi ngena ledo nepangajari tapi aga netevai, seharusna hae suvu atura rakavia totuata pura ri ada hae, contona, mombatevaika kita pura hi ala nemo sampe morambanga posampe suvuta ra ngata hi aga gara-gara ledo nosangu pompelisi.

Vesia hae ranga, tapi hi atura nikavia eranga kate hau niuli ledo madota mombataria garaka 2019 ganti presiden, ledo kaupuna aga niponguaka ntona bayangimo.

Padahal garaka hae ala rasani miu, garaka hae naria dasarna karna todea ledo napuas ante nuapa-nuapa nikavia nu pamarenta hi, makanya geira novia nuanu vesia.

Jadi seharusna ledo panggava tona hae ledo ratarima, harus ratarima, karna vehaemo ranga aturana. Vesiamo ruru lee suvu damo maria vai ngena tempona kita mosingga. Tabe. (TOPANJAYO-NJAYO)