Topo Sambaya Bobayana Nakuramo

oleh -

Bara rumba puramo ranga topo sambaya subu ri masigi suvu, apa eva niaparantaeka belo – belo eo eona hi eva nompamulamo nakura nju sangu shaff.

Domo muni nisaniku lee, nemo – nemo geira domoria hi nosambaya ri banua mbotomo atau bara aga nekenimo ngena sanda nu rara ato berimbana ngena, apa eva dako partamana puasa hae geiramo nerimba hau ri masigi ane bobayana ranga.

Tapi nakava hitu mai mesua saminggumo puasa, geira toperimba kate aga geira vai ledoria lenjera ri masigi. Anu berimba ngena vesitu le suvu.

Kate aga namangga ri partamana nggo komiu, eranga, namadai vai sampe suvuku pura huu. Mba komiu lee kutevaika kakomiu, boitumo itu nemo mamango gaga majadi manusia vei.

Mabiasa – biasamo ranga, apa nakava muni ngena tempona komiu mboto mambela vatuna kamango miu tue.

Boitumo ranga suvu, sangupa hi kutevai kakomiu pura ranga, ane hau ri masigi hae manggeni sajada ledo aga hpmo hpmo tue rakeni kate aga makava mosifoto – foto komiu ramasagi, tabua – buana muni.

Itumo itu haselena komiu nanggeni hp ri masigi ledo gali nu rara nikeni nanjili kate aga tesa namango nikeni. Nasodo mpu ranga.

Ledo nesinggu lee suvu tapi asupaya komiu matebuka muni sakide panggita tue ranga. jadi vesimo ruru lee damo maria vai ngena tempona kita mosinggava. Tabee. (TOPANJAYO-NJAYO)