Sampe suvu sararaku lee, alarasani miu ranga nasompomo kita hi ruampae labi ranga Leria Wakil Gubernurta suvu.
Ane rareke – reke napanga muni ranga, eva leria kaupuna tona nipelisi mombadampingi Longki Djanggola, maipiamo vei?.
Sararaku pura – pura lee, ledo bara berimba hi ranga, ane kita to kodi vesihi nanggitana eva nalenge muni ranga naggita gubernur nokarja saitona.
Apalagi hituhi kita nidekeika tupu ta’ala pombalajari vai, dako ri linguna, tsunamina, sampe ri liquifaksi bo poiri nagana nidekeika kakita pura.
Padahal ane maria wakil gubernurta hi, domo malenge gaga gubernur mokarja saitona kan, apa nariamo roana damo mosiaturu jadwal sema – sema mombaurusi nuanu hi nuanu hae.
Tapi hi rapeinta miu, nuanu hi nkarjai gubernur muni nuanu hae muni nikarjai gubernur muni. Vesia ngena lee ane panggita kami to kodi moti vesihi ranga.
Jadi nuanu hi mamala raparantaeka miu tona ribavona hituhi yaa, asupaya rabahas miu mamimo ranga. asupaya maupu mamimo.
Ledo bara berimba lee, njayoyo yaku hi nolipa – lipa dako ritenda sanguna sampe ri tenda sanguna, nadea tona nekutana mbamo vei ranga wakil gubernur, nakuya damo aga Longki saitona nju hau tumai nipeinta kami ri berita.
Ledo kita nasala suka muni kita nesana, eranga, eee mba komiu nosangaka partai pengusung, urusu miumo ranga masasinta lee.
Jadi vesiamo ruru suvu, damo maria ngena tempona kita mosinggava vai, tabe.(topanjayoNjayo)
