Rabaca Qora,Domo Aga Pomotoro,Langundi,Domino!

oleh -

E.. ngana mpu le,rampuasa aga nadea inggu ledo nabelo le. Nuapa vai itu,nuapa tano gera ngana ngapuri damo aga pomotoro nabo bayamo pangaviara rampuasa hi eva nipeinta ta ri ngata Palu hie. Naria nosigandemo randa ante kabilasa nanjayo hau ri talinti,damo njumangu gera le. Nuapa raala miu ngana,aga mompakarugi bensi miu ante,makura nilai pahala rakava. Erangga.

Ledo aga tutu le,ane mapara mo mangaviamo naria muni gera,aga nompevoro lagundi vai,damo naroa gera,pangava ra mboto,ante pangulira,mompevoro lagundi hai ngena mantomoraka topo ba ri Masigi. Asupaya vei,ledo nirasai waktu mobuka puasa motona ri masigi,pade manau mo lagundi. Eranga,alasa nadea mpu nipovia nu ngana.

Eranga ngana, aginamo komiu ri masigi,bobayana,ante maopu mosambaya asara,ee mamalamo mandiu,mombaca Qora bara sakuya ntau isi nu Qora rabaca,itu pade nabelo. Maroa-roa,ane maria,bago dako gera ri kabilasa Masigi ane natopa niuli,Risma,nabiasa bula puasa hie,nadea bago nikaviara hai,naria mo lomba,mombaca Qora,eva anu ri MTQ hia. Aa, itu nabelopa. Asupaya ramanfaatkan ta mpu hi bula puasa hie. Apa ledo ngena pae makava,rakavata vai bula hie.

Kasampata mami. Pakabelo posambaya,pombaca Qora pakadea ngani matama. Hitu muni sangu suvu,totua ngana simbayau, ane totua biasana,gera aga pomore domino sampe matanga bongi pade magaro pomorera. Ane ledo,masahur dopa manjili. Hi nakanca pa muni totua. Simbayu pura. Magaya bayangi le suvu,berimba pangava miu. Ante totua ngana,singani mo mosipokio maroa-roa hau ri masigi,ala masalama ri dunia ante masompo kasalamata ri akhera. (TOKASOALA)