Sampe suraraku pura-pura, mba komiu lee suvu naria vai sakide hi kareba ku keniaka kakomiu pura suvu. Kareba hi nakava dako ri ngana no ujian nasional ri posikolana ranga.

Nuapa tano PLN muni eva nantambai katabuabuana lee, masa muni ngana da sementara no ujian maria sangujamo tiba-tiba langsug napaya pasanggani poindo ranga. Ledo bara berimba lee suvu, apa nariamo ranga ngana melabi talupulumo soal nikarjaina begitu poindo napaya najadi nokarja panjili ngana ranga.

Vesie lee sarara, ane dako partamana mami maria petevai dako ri PLN makana sakide asupaya kapasikola mariamo persiapanakan aginamo mompake masina genset mami asupaya ngana domo mokarja ruanggani ranga.

Tapi hie suvu ledoria saba nuapa tiba-tiba napaya pasangganimo poindo, sementara ngana nokarja soal hae nariamo waktuna nidekeika nu pengawas ranga. Otomatis madota bo ledo bara mapaya poindo atau makuya waktu hae majala nju ranga apa ane vesia sema narugi kira-kira lee, tantu anata kan.

Boitumo hae eva nahera muni yaku ante PLN hi ranga, padahal dako rurupa niulikamo gubernur domoria ngena poindo mapaya-paya ane ngana mo ujian. Tapi kana nariapa muni ranga.

Ane aga sanggani panagane suvu bara mamala to PLN merapi maaf ante posikola-posikola, tapi hitu suvu reasani miu dako ngana SMA/MA riavi sampe hi ngana SMP/MTs no ujian naria njuranga kapaya nupoindo.

Pada hae poindo napaya nonggani-nggani ranga, sema muni ledo masingi liona manggita PLN ane vesia hae panggaviara. Jadi mba komiu lee toponturo ri kadera no goya-goya nemo aga matau motesa ante motunju roko nggo lee, kana raparingati miu sakide PLN hae.

Kakomiu muni ri PLN kana raparantaeka lee, rauusahaka kajadia hi panggaupunamo ngena asupaya mpae-mpae makava domo maria vai ane vesihi lee, jadi kana raepe nemo aga rabaca nggo pade rakalingasi lee. Jadi vesiamo ruru lee suvu maria vai ngena tempona kita mosinggava. Tabe. (TOPANJAYO-NJAYO)