Naria muni kasikuruna kita, ngata ri Palu hi le nikakava Presiden Joko Widodo ri eo Salasa naliu, naria muni ledoria belona, apa ngatata ri Palu niuli ntona natolare “Radikal”. Apa ane panguli tona nosikola hai ngena jarita nanguli Radikal, simbayuna ante tona ledo ria pompekirina, ane ledo tona ledo ria posikolana, bo nasimbayu muni ante tona nakabagana bo nambongo.
Hai ledo mompene rata le, ane rauli tona ivesia kita. Pade rangatata kita niulina ivesia, simbayuna kita hi ni pakalenda tona dako rangata santanina, nasimbayu muni kita tupu banua nikakava torata, pade nidunggasakana kita bo nijejena punantambolota.
Tona neuli Radikal hai, Ketua Umum PMII novia avara ri asrama Haji Palu, kaposiromura risiya hai ane ledo masala mpatora, saminggu saena geira risiya hai. Jarita Ketua Umum PMII hai le, waktu geira nompamula acara ri eo Salasa, ringayo Presiden Joko Widodo.
Sararata dako rangata Palu naria ripo acara hai ledo santingoa geira, nemo-nemo bara naeka geira ante Ketua Umum PMII, ane ledo naeka ante Presiden bara. Mau tuweita ri organisasi PMII dako ri Palu ledo bu ledo ba, nekonjo pura etena geira.
Pade ngena ane ante totuara mboto, tuakara mboto, tuwera mboto, domo singgamango pura ane nojarita. Eva aga iya ntotomo natau, kana domo ria kanana ante tona ntanina, pade-pade ngatana niulintona radikal ledo santingoa geira.
Domo le ivesiamo ruru, domo mosintomu vai kita ngena ri eo santanina. Tabe ….. (Mangge Kelo)
