Ee suvu,mba komiu topo ngana kodi nasaro nikava ribivi nu dala gera noraga lagundi kodi nabotu. Kajaga mami,komiu ngana,apa ledo ngena aga sakide oto ante motoro ri tatanga nu dala hai. Perapii ante komiu totua nungana ante muni topo oto ante motor,rapenta-penta ngana moraga lagundi hai. Apa sisii gera,nasaro npenta ngamata naroa-naroa noraga lagundi kodi nabotu dako ribana.
Komiu totua nungana muni,jaritaka ka ana miu,popatoraka gera nemo moraga lagundi ri bivi nudala,nabahaya nadea pesavia ntona. Nadea ngana hi nikava, rara nu kota biasana,eva eo naliu,ri dala pue Bonggo. Ngana hai,ante lagundi ri pale,ante bana nabotu hai noraga lagundi. Naria mo nompene lagundi ne kai,ri bavo nuata banua ntona. Ee, kajaga komiu ngana!
Tora-tora panguli totua,ante mangge miu,ane moraga lagundi domo ranga ri bivi nu dala,nadea bahaya. Jadi vesia mo ruru suvu. Ane maria mo ngana ante ampa ato alima moraga lagundi,peta mami,ulika ka gera domo moraga lagundi hai,ledo naria untuna. Aga bala rakava miu,mompakasa sua totua,ante todea ri dala. Apa gera morumpa komiu ngana,raboba todea gera,apa domo nisani,isemamo masalah,topo rumpa ato komiu ngana. Ee, ngana! Ngana mpu le,ane niulika aga nadea pebanta. Cambu mo hai ane membanta! (MANGGE PONGUA)
