Kabelo, Naria Caleg No Lenje Randua

oleh -
Gambara Caleg Nolenje Randua. (FOTO ri Google)

Eva domo muni nipahaku geira majadi calon pajaba hae suvu, geira anu majadi calon legislative hamai yaa anu monturo ri kadera nogoya-goya.

Apa niparantaekaku hi eva damo nggapuri hi ranga nakava nekirapai.

Damo marapa tempona kita mompelisi vai pade geira mopangakuka kita sampe suvura, mopangakuka kita hi roara eranga namadai mpu. Damo maria dotara pade geira makava mekirapai kita madota mosikanala nte kita.

Nggapuri-puri souhia mbana geira madota makava nte kita ranga, nemopa makava nte kita, kajapa kaca nu oto mai eva nantamo mpu ranga palera hae mobukana. Mbana ranga nipompekirikana kita to kodi vesihi suvu.

Eranga, no randua puramo ranga lenje no caleg-caleg nggapuri hi suvu, jadi mba komiu lee, komiu anu majadi caleg tue ya kutevaika mami lee nemo masombo gaga majadi manusia apa kita hi hau pura muni ngena, jadi leria gunana ranga komiu masombo vesitutu.

Jadi, kakomiu muni sampe suvuku pura-pura kutevaika muni rapeinta pakabelo lee ane mompelisi ngena nemo madota mompelisi geira kabiasana mau kaca nu oto domontoto naria nitauraka, geira aga nariadotara pade nekirapai ante geira nompokono no bagi-bagi doi vesia hae ya.

Asupaya muni ngatata hi domoria pajaba anu masombo-sombo apalagi pajaba maeka-eka lenjena masovu. Nemontoto ranga rapelisi anu vesia hae suvu apa aga nompaka rugi kita mboto ngena.

Kana ratora lee panguli nu Tupu Ta’ala ane isema-sema kita tulau nompadekeika doi ante kita nidekeika doi karna maria tujuta asupaya padagi ratora ponturota ngena ane ri ahera radika ri neraka ranga suvu.

Jadi vesiamo ruru lee suvu damo maria vai ngena tempona kita mosinggava, perapi do’a suvu kita pura kana maseha-seha sampe kita raposintomuka ante bula puasa le. Tabe. (TOPANJAYO-NJAYO)