Suvu perapi doa maroa pura masigi ri pangaopuna bula puasa hi le. Ane komiu suvu, maria kasampata ante masahe belo pukaro, ee kana mosabaya rimasigi le, apa ri bongi kasapulu pangaopuna nadea baraka nikavata le ane panguli topo carama. Nisanita pura mo itu, aga sanda nurara damo nambaso, ni paka kodi haja mompaka belo posambaya rampuasa,nipaka mbaso hai suvu aga haja berimba toples bo maisimo. Anu ngaulu itu le. Domo vesia le! Pakaroa mo masigi.
Tapi suvu, Alhamdulillah da roapa masigi ri Palupi Kecamatan Tatanga, ri bongi naliu posambaya tarawe suvu hamai. Topo sambaya nobarisi na sompo ribengona le, mapara anu niuli tabe, pombatasi mombine. Alhamadulillah! Apa kabiasa ta muni ri bongi do masae bula puasas hie maopumo, kita aga mompaka roa potomu,ri mol-mol mbaso, nadea tampa-tampa nobalu baju ntanina, ante paralu-paralu todea le.
Domo nisanita le, ante masigi ntania,raperapita doa muni ka suvuta,mompaka roa masigi raposabaya, tarawe, ante ane mamala rapakasa mo bata hie, mamala maturumo ri masigi sambongi, mosambaya, mombaca qora kaseana bongi hai. Ala rakava ta mo bongi baraka hai suvu. Pakaroso kente, ante nia nipohaja ta pura le! (TOKASOLANA)
