Namadai mpu ranga totua bo ngana nggapuri le, nompalakana hau manginu kopi ri waru kate aga nakava nobataroka topo mainbala ranga ri televisi mai ya.
Eranga bara domo nantora ahera geira hae suvu, pade pobatarora hae suvu ane rasani miu pura ledo ngena bara aga sampeka atau sambungu roko suvu, tapi naria muni ranga nobataroka kunci numotoro nte kunci nuoto suvu.
Leisaniku muni bara nuapa ntoto rasana geira topo bataro hae suvu, manjili mai ngena ri banua napojomo nadua balengga, pade mnggaremba vai eranga bo nabinata mpu kainggua vesia hae lee.
Naria suvu ri ngatata hi waru vesia hae, aga domo kuuli ranga rumba waruna hae, aga mba komiu lee pulisi kutevaika kakomiu koi polipa-lipa vei ri waru-waru kopi hae ane maria rakava miu topobataro vesia sakamo hau ranga suaraka ri selmo hau aga nompaka soe ngata topobataro vesia.
Ee suvu mba komiu lee, mau rauli miu aga sanggani hae komiu mobataro ranga tapi ane ledo raperapi komiu majadi makatagia ngena ai kabelo mami lee maupu pura ngena mbara-mbara ri banua.
Jadi suvu kana kuperapi nte komiu pura penonto mobataro, nemo ngena da sementara mongare-ngare komiu mantara bala apa nobataro makavamo ngena malaeka mepongare ai kabelo mami lee.
Jadi kana penonto suvu, vesiamo ruru bara damo maria vai ngena tempona kita mosintomu, perapi doa kana maseha-seha pura kita tulau. Tabe. (TOPANJAYO-NJAYO)
