Nosi Temba Vaimo ri Poso

oleh
Oto nanggeni DPO Nambela Nitemba ri Poso, Eo Sine (4/3). (FOTO : MAL/Faldi)

Sampe suvu sararaku lee, dopa nasae hi arasani miu nosi temba vaimo ranga pulisi/tantara hamai ri Poso, ante geira niposangaka Kelompok Sipil Bersenjata (KSB).

Geira niuli KSB hi suvu, geira nangakuka Mujahidin Indonesia Timur (MIT) nipobalenggai Almarhum Santoso, pade hituhi vai Balenggana Ali Kalora.

Suvu, positemba hi ledo muni berimba gaga le, ledo bara sampe nagado berimba ntoto hamai ri poso, tetap na ama pura sararata hamai ri poso, apa topositemba hamai ri buluna ranga.

Ripositembara hituhi suvu, sangu dako geira ri Kelompok Sipil Bersenjata hai nambela namate ranga, sanguna vai namala nisaka, pade santanina vai sementara niraga nu pulisi/tantara nju ranga.

Sampe pangane hitu suvu, geira KSB hi maria sapualima  pura-purana, pade hitu naria vai namate bo nisaka, berarti damo saputatalu geira naboli hamai ri buluna.

Aga dopa nisani suvu, karna doparia petevai dako geira pulisi ri polda sulteng, apa nuanu vehae geira nasaro nodekeika petavai ka wartawan ranga.

Suvu, arasani miu muni lee, mpae naliu geira ri DPR RI nariamo ranga nosuvuraka teas ane Operasi Tinombala hi deanamo doi nu Negara naupu ranga.

Eranga, eva aga naheramo muni kita naggitana, nakuya sebenarna dopa naupu-upu nuanu vehae suvu, padahal souhiya niuli damo papitu KSB hi naboli tapi kana dopa muni namala niatasi mpulisi.

Kaupunamo ranga hituhi suvu, ledo nakura geira ri KSB botano aga natetambai ranga. Jadi vesiamo ruru lee suvu, damo maria vai ngena tempona kita mositesa singgani le. Tabe. (TOPANJAYO-NJAYO)