Netidoyo Vaimo Japi ri Palu Barat

oleh
Ilustrasi

Namdai binata, mau berimba katauna kana netidoyo geira, mau nitataka pakabelomo, nisuruaka rikurunga (ri gimpuna) kana netidoyo geora, sangana binata ya tantu vesiamo hai podekei nu Tupu Ta’ala ante geira binata. Eva japi ri Palu barata netidoyo vaimo geira, nabelo-belomo maria sambula domo naria neonga ridala, ee,e,e,e, kana neyumba vai geira nompakabago topo liu.

Ane noto binata hai, berimbana kurunga nipoviaka langana, kambasona, ane ledo niparantaika kandeana, bo ma’ara taina, kana manggarumpa ia, berimba carana sampe geira mesuvu dako ri gimpuna mai. Ivesia muni ante binata nabiasa mamimo nasanjayo ridala, kana navulesa muni geira ngena ane masae gagamo domo nanggita dala.

Jadi le, kana mosipapatora vaimo kita, apa aga mosipapatora nju belona ane kita manusia, apa lagi ane kita nosarara pura, nosampe suvu pura rangata nu Kaili hi. Ane mamala le mbamo komiu topo japi tu ya, nemo radekei miu japi galaitu masanjayo ridala mangelo kandeana mboto, asupaya ngatata hi ledo rauli tona nasurempu.

Palu muni domo ranga eva nggaulu, danadea rumpu belo natuvu ri doyatantona, ri tanantona. Palu najadimo Kota mbaso, nadea sarara nakava dako ri sangatana, jadi le kana rajagaita ngata nemo raulintona Palu Kota Desa, apa nadea japi nipeintana ridala.

Komiu muni Pamarenta ane mamala, bara rapeili miu muni geira topo hobi nompatuvu japi hai, bara radekeika bantua sakide movie gimpuna, berimba belona asupaya pangande japi hai mabelo, asupaya mabelo muni pokaro nu japi. Apa todea ante Pamarenta aga mosinggani mabelo, ledo sangayana dala raose Pamarenta, sangayana muni geira todea, anu ledo nakabelo ngena tu le… tabe vesiamo ruru kareba, petevai ka kita pura-pura. Tabe (Mangge Mbaso)