Naceme Vai Ruma Saki Undata Le

oleh
(DOK. METROSULAWESI)

Sampe suvu sararaku pura-pura, ala rasani miu suvu nesuvumo atura nu pamarenta anu nombaaturu geira-geira mamaju ri pemilu mpae makava ngena.

Ri aturana hae suvu, niuli aga Alima ruma saki ri ngata hi mamala mosuvuraka sangana “Surat Keterangan Kesehatan” ka geira no sangaka caleg, ruma saki Anutaloko ri ParigiMautong, ruma saki Mokopido ri Toli-toli, ruma saki nu Pamarenta Ngata Luwuk ri Luwuk, ruma saki nu pamarenta Morowali ri Morowali ante ruma saki Undata ri Palu.

Jadi pura-purana geira anu majadi caleg hae suvu eva dako ri Palu, Poso, Morowali, Morowali Utara, Parimo, Banggai, Banggai Laut, Banggai Kepulauan, Tojo Una-una, Toli-toli, Buol, Donggala ante Sigi aga mangova riumbana ruma saki narapa nte geira.

Contonamo eva caleg dako ri Sigi nte Donggala paling aga mangova ri Undata pura ranga berarti mompene vai sakide panggava nu ruma saki undata hae, apa ruma saki ri ngatara dopa namala nosuvuraka sura eva niuli ri atura nu KPU hae ya.

Aga ledo nisaniku suvu sakuya biayana saito ane nosuvuraka sura vehae ri ruma saki bara ni aturu atau ledo, dopa muni nisaniku ranga, atau bara naria potongana vai sakide ka geira nu caleg hae apa niepeku ledo nasimbayu biayana vei ane kita biasana nosuvuraka sura vehae ante geira ane majadi caleg.

Jadi rareke miu mbotomo suvu sakuya rakava nu ruma saki eva undata hae dako geira ri caleg ranga, apa niepeku hi suvu kajapa caleg aga dako ri ngatata hi eva ri palu barat nggo hae mekava satu lima pulu dopa vai ratambai dako geira caleg ri kecamatan ntanina eva ri palu selatan, palu timur pade ratambai vaimo dako ri sigi nte donggala tantu madea mpu ranga.

Jadi yaa berarti ri mpae hi suvu ane rapompekiri pakabelo harusna hae panggava nu pamarenta propensi anu niuli Pendapatan Asli Daerah (PAD) mompene sakide lee, mau aga sakide ranga karna bayangi miu mboto vei sakuya deana caleg hau ri undata hae aga mosuvuraka kartasa nitanda tanga nu dokter hae.

Jadi haemo ruru bara kareba kudekeika kakomiu lee suvu, damo maria vai ngena kareba ntanina ri tempo makava. Tabe le. (TOPANJAYO-NJAYO)